ក្រុមការងារបច្ចេកទេស កំពុងពន្លឿនការតុបតែងលម្អភ្លើងពណ៌ និងវត្ថុផ្សេងៗ ដើម្បីត្រៀមស្វាគមន៍ភ្ញៀវទេសចរណ៍ ក្នុងព្រឹត្តិការណ៍សង្រ្កាន្តឆ្នាំថ្មី

បាត់ដំបង ៖ ក្រុមការងារបច្ចេកទេសនៃមន្ទីរពាក់ព័ន្ធមួយចំនួនបាននឹងកំពុងពន្លឿនការរៀបចំតុបតែងលម្អបណ្តាញភ្លើងពណ៌ ស្តង់តាំងលក់មុខទំនិញ ចំណីអាហារ និងសម្ភារៈប្រើប្រាស់ផ្សេងៗដើម្បីត្រៀមស្វាគមន៍ដល់ភ្ញៀវទេសចរណ៍ដែលនឹងអញ្ចើញមកទស្សនាកម្សាន្តក្នុងព្រឹត្តិការណ៍សង្រ្កាន្តឆ្នាំថ្មី ២០២៥ ខាងមុខនេះ។

ហើយការរៀបចំតុបតែងលម្អឆ្នាំនេះដែរ យើងឃើញថាមានលក្ខណៈស្អាត ប្លែក និងទាក់ទាញជាងបណ្ដាឆ្នាំមុនៗ ដោយខាងរដ្ឋបាលខេត្តជ្រើសយកទីតាំងចាប់ពីចំណុចបរិវេណសួនវិមានឯករាជ្យ រហូតដល់ខាងមុខអគារសាលាខេត្ត ដែលមានទីធ្លាធំទូលាយ អាចអោយបងប្អូនប្រជាពលរដ្ឋ ក៏ដូចជាភ្ញៀវទេសចរជាតិនិងអន្តរជាតិ អញ្ជើញមកទស្សនាកម្សាន្ត ប្រកបដោយភាពសប្បាយរីករាយ។

គួរបញ្ជាក់ថា ព្រឹត្តិការណ៍សង្ក្រាន្តបាត់ដំបងឆ្នាំ២០២៥ ដែលរៀបចំដោយសហភាពសហព័ន្ធយុវជនកម្ពុជាខេត្តបាត់ដំបង សហការជាមួយរដ្ឋបាលខេត្តបាត់ដំបង និងប្រព្រឹត្តទៅរយៈពេល ៤ថ្ងៃ ចាប់ពីថ្ងៃទី ១៣ ដល់ ថ្ងៃទី ១៦ ខែមេសា ឆ្នាំ ២០២៥ ហើយព្រឹត្តិការណ៍នេះនឹងផ្ដល់ជូននូវទស្សនីយភាពប្លែកៗពិសេសៗយ៉ាងសម្បូរបែបផងដែរ ៕

ដោយ ៖ សាលី