ជិះម៉ូតូឆ្លងផ្លូវមិនប្រយ័ត្ន ត្រូវរថយន្តបុក បណ្តាលឲ្យមនុស្ស ០៤នាក់ ស្លាប់និងរបួស
បាត់ដំបង ៖ យ៉ាងហោចណាស់០២នាក់ប្តីប្រពន្ធបានស្លាប់ភ្លាមៗ និងចៅប្រុសស្រី០២នាក់ រងរបួសធ្ងន់បន្ទាប់ពីជិះម៉ូតូឆ្លងផ្លូវមិនប្រយ័ត្ន ត្រូវបានរថយន្តបើកបុកអូសជាច្រើនម៉ែត្រនៅវេលាម៉ោង ១៦និង២០នាទី ថ្ងៃទី១៥ ខែមីនា ឆ្នាំ២០២៥ នៅចំណុចផ្លូវបំបែកហាយវ៉េ ស្ស្ថិតក្នុងភូមិស្វាយធំ ឃុំអូរដំបង២ ស្រុកសង្កែ ខេត្តបាត់ដំបង។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញម៉ូតូម៉ាកវ៉េវ ពណ៌ក្រហម០១គ្រឿង ពាក់ផ្លាកលេខ បាត់ដំបង1AH-5704 បើកបរដោយបុរសឈ្មោះ អ៊ុន អន អាយុ៦៣ឆ្នាំ(ស្លា.ប់) និងអ្នករួមដំណើរប្រពន្ធឈ្មោះ ផៃ ពុំ អាយុ ៦១ឆ្នាំ (ស្លា.ប់)និងចៅប្រុសឈ្មោះ តឿ សំណាង អាយុ០៦ឆ្នាំ(របួសធ្ង.ន់)ចៅស្រីឈ្មោះ ភ័ក្រ ស្រីណុច អាយុ០៩ឆ្នាំ(របួសធ្ង.ន់) ទិសដៅពីជើងទៅត្បូងឆ្លងផ្លូវ ភ្លាមនោះក៏មានរថយន្តម៉ាកHino ពណ៌ខៀវ០១គ្រឿង ពាក់ផ្លាកកលេខ កំពង់ចាម3A-0054 បើកបរដោយបុរសម្នាក់ទិសដៅពីកើតទៅលិច លុះមកដល់ចំណុចកើតហេតុក៏ជ្រុលទៅបុកម៉ូតូអូសជាច្រើនម៉ែត្រ បណ្តាលអោយពីរនាក់ប្តីប្រពន្ធស្លា.ប់ភ្លាមៗនៅកន្លែងកើតហេតុ និងចៅប្រុសស្រី០២នាក់រងរបួសធ្ងន់។
ក្រោយពេលកើតហេតុសមត្ថកិច្ចនគរបាលជំនាញបានចុះទៅដឹកបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យ បន្ទាប់មកក៏បានវាស់វែងធ្វើកំណត់ហេតុប្រគល់សពឱ្យក្រុមគ្រួសារដើម្បីយកទៅធ្វើបុណ្យតាមប្រពៃណី ចំណែកមធ្យោបាយទាំងពីរយកទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំដោះស្រាយតាមផ្លូវច្បាប់ ៕
ដោយ ៖ សាលី