សម្ព័ន្ធគ្រូពេទ្យសហភាពសហព័ន្ធយុវជនកម្ពុជា ចុះពិនិត្យព្យាបាលជំងឺដោយឥតគិតថ្លៃ ជូនប្រជាពលរដ្ឋក្នុងស្រុកគងពិសី
កំពង់ស្ពឺ ៖ សម្ព័ន្ធគ្រូពេទ្យសហភាពសហព័ន្ធយុវជនកម្ពុជា នៅថ្ងៃទី១៦ ខែមីនា ឆ្នាំ២០២៥នេះបានចុះពិនិត្យ ព្យាបាលជំងឺដោយឥតគិតថ្លៃជូនប្រជាពលរដ្ឋក្រីក្រក្នុងភូមិសាស្ត្រស្រុកគងពិសី ដែលការពិនិត្យនិងព្យាបាលនេះដឹកនាំដោយលោក ហេង សុខគង់ ប្រធានសម្ព័ន្ធគ្រូពេទ្យសហភាពសហពន្ធ័យុវជនកម្ពុជា លោក ជាម ចន្ទ័សោភ័ណ អភិបាលខេត្តកំពង់ស្ពឺនៅក្នុងបរិវេណអនុវិទ្យាល័យអង្គមេត្រីម៉ឺន ភូមិដំរីស្លាប់ ឃុំព្រៃវិហារ ស្រុកគងពិសី ខេត្តកំពង់ស្ពឺ។
យោងតាមការលើកឡើងរបស់លោក ជាម ចន្ទ័សោភ័ណ អភិបាលខេត្តកំពង់ស្ពឺបានឱ្យដឹងថាប្រជាពលរដ្ឋក្រីក្រនិងកុមារប្រមាណជាង១២០០នាក់ បានមកទទួលការពិនិត្យនិងព្យាបាលជំងឺជាង១៦មុខ ពីក្រុមគ្រូពេទ្យនិងវេជ្ជបណ្ឌិតជំនាញៗ ក្រោមការប្រើប្រាស់បរិក្ខាទំនើបនិងឱសថល្អៗ។
អភិបាលខេត្តកំពង់ស្ពឺក៏បានបញ្ជាក់បន្ថែមថា នេះមិនមែនជាលើកទីមួយនោះទេសម្រាប់ខេត្តកំពង់ស្ពឺ ដែលក្រុមគ្រូពេទ្យសហភាពសហព័ន្ធយុវជនកម្ពុជាបានចំពិនិត្យនិងព្យាបាលដល់ប្រជាពលរដ្ឋ កុមារកំព្រា ពិការ។ការចុះពិនិត្យព្យាបាលនេះដែរ បង្ហាញឱ្យឃើញពីការគិតគូយ៉ាងខ្លាំងរបស់ថ្នាក់ដឹកនាំ ពិសេសគឺលោកឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ប្រធានក្រុមការងាររាជរដ្ឋាភិបាលចុះជួយខេត្តកំពង់ស្ពឺ។
លើកឡើងក្នុងឱកាសនោះដែរលោក ហេង សុខគង់ ប្រធានសម្ព័ន្ធគ្រូពេទ្យសហភាពសហពន្ធ័យុវជនកម្ពុជា បានលើកឡើងដោយគូសបញ្ជាក់ថា ក្នុងការពិនិត្យព្យាបាលជំងឺជូនបងប្អូនប្រជាពលរដ្ឋនៅក្នុងស្រុកគងពិសីនេះគឺមានវេជ្ជបណ្ឌិត គ្រូពេទ្យជំនាញនិងល្បីៗ មានបទពិសោធន៍លើជំងឺទាំង១៦មុខ។ក្នុងការចុះពិនិត្យព្យាបាលនេះដែរ គឺក្រុមគ្រូពេទ្យបានបំពាក់ទៅដោយបរិក្ខាពេទ្យទំនើបៗ ឱសថល្អៗនិងមានគុណភាពខ្ពស់។
លោកប្រធានសម្ព័ន្ធគ្រូពេទ្យសហភាពសហព័ន្ធយុវជនកម្ពុជា បានបញ្ជាក់ថាក្រុមគ្រូពេទ្យទទួលការព្យាបាលជំងឺ១៦មុខ ដែលរួមមានជំងឺទូទៅ វះកាត់ ជំងឺភ្នែក ត្រចៀក ច្រមុះនិងបំពង់ក សន្លាក់ ជំងឺកុមារ រោគស្ត្រី និងពិនិត្យផ្ទៃពោះ ជំងឺមាត់ធ្មេញ ជំងឺផ្លូវចិត្ត កាមរោគ និងសើរស្បែក ជំងឺផ្លូវចិត្ត ពិនិត្យឈាម ព្រមទាំងផ្តល់ជូនថ្នាំពេទ្យក្រោយការពិនិត្យរួច។
លោក ហេង សុខគង់ បានបន្ថែមថា ការចុះមកពិនិត្យព្យាបាលជំងឺដល់បងប្អូនប្រជាពលរដ្ឋដោយឥតគិតថ្លៃនេះ គឺក្នុងគោលបំណងជួយលើកកម្ពស់សុខុមាលភាពប្រជាពលរដ្ឋ ពិសេសដើម្បីឱ្យប្រជាពលរដ្ឋ ចំណេញពេលវេលាក្នុងការរកទទួលទាន និងធ្វើឱ្យពួកគាត់មានសុខភាពល្អជាប្រចាំដោយមិនចាំបាច់ចំណាយទៅលើការទិញថ្នាំពេទ្យ និងទៅរកគ្រូពេទ្យ និងសន្សំសំចៃថវិកាបានថែមទៀតផង។មួយវិញទៀតការចុះពិនិត្យព្យាបាលជំងឺជូនប្រជាពលរដ្ឋនេះដែរគឺជាស្មារតីមនុស្សធម៌សុទ្ធសាធ ដែលស្តែងចេញពីសេចក្តីស្រឡាញ់បងប្អូនប្រជាពលរដ្ឋនិងផ្តល់ក្តីស្រឡាញ់ជូនដល់ក្មួយៗកុមារដែលកំពុងកើតមានជំងឺត្រូវការព្យាបាល៕
ដោត ៖ ប៊ុត សារុន