ឯកឧត្ដម អ៊ុំ រាត្រី ប្រគល់ផ្ទះថ្មី១ខ្នង ជូនលោកយាយ សែម យ៉ុន ដែលត្រូវបានអគ្គីភ័យឆាប់ឆេះកាលពីចុងឆ្នាំ២០២៤

បន្ទាយមានជ័យ ៖ នៅសៀលថ្ងៃទី១៤ ខែមករា ឆ្នាំ ២០២៥ ឯកឧត្ដម អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ ប្រគល់ផ្ទះថ្មី១ខ្នង ជូនលោកយាយ សែម យ៉ុន អាយុ៧៨ឆ្នាំ មានជីវភាពខ្វះខាត់ ផ្ទះត្រូវបានអគ្គីភ័យឆាប់ឆេះកាលពីពេលកន្លងទៅ ស្ថិតនៅភូមិជំទាវ ឃុំឬស្សីក្រោក ស្រុកមង្គលបូរី និងបានផ្តល់អំណោយជូនគ្រួសារមានជីវភាពខ្វអចាត់ចំនួន១០ទៀតផងដែរ។

នាឱកាសនោះឯកឧត្តម អ៊ុំ រាត្រី បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុ ន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់លោកយាយ អុំ ពូ មា មីង និងបងប្អូនប្រជាពលរដ្ឋដោយក្ដីនឹករលឹក។

ឯកឧត្តមក៏បានសម្ដែងក្ដីសោកស្ដាយចំពោះគ្រោះអគ្គិភ័យដែលកើតឡើងធ្វើឱ្យផ្ទះរបស់លោកយាយ សែម យ៉ុន ត្រូវបានបំផ្លាញទាំងស្រុងក្នុងមួយពព្រិចភ្នែក ។ ឯកឧត្ដម បញ្ជាក់ ថា ក្រោយពីទទួលបានព័ត៌មាន ភ្លាម សាខាកាកបាទក្រហមកម្ពុជា ខេត្ត ក៏មិនព្រងើយកន្តើយ បានចាត់ក្រុមការងារក្នុងការជួយនឹងសាងសង់ផ្ទះថ្មីជូនលោកយាយ សម្រាប់ជាជម្រកថ្មី រស់នៅ។ ឯកឧត្ដមបានបន្តថា ទោះក្នុងកាលៈ ទេសៈ ណាក៏ដោយ កាកបាទក្រហម កម្ពុជានៅតែរួមសុខរួមទុក្ខជាមួយនឹងបងប្អូនប្រជាពលរដ្ឋគ្រប់កាលៈទេសៈ មិនថាទីណាកន្លែងណាក៏ដោយឱ្យតែមានទុក តែងមានកាកបាទក្រហមជានិច្ច

សូមបញ្ជាក់ថា ផ្ទះលោកយាយ សែម យ៉ុន អាយុ៧៨ឆ្នាំ ដែលរងគ្រោះដោយភ្លើងឆេះផ្ទះទាំងស្រុង កាលពីថ្ងៃទី២៤ខែធ្នូ ឆ្នាំ២០២៤កន្លងទៅ។ ដោយពិនិត្យឃើញថាគ្រួសារលោកយាយ មានជីវភាពលំបាក រស់នៅអចិន្ត្រៃយ៍ក្នុងភូមិ និងមានដីកម្មសិទ្ធិ សម្រាប់សង់លំនៅដ្ឋានបាន និងមនការយល់ព្រមពី គណៈ កម្មាធិការសាខា មន្ត្រីសាខាបានសហការណ៍ចាប់ផ្តើមសាងសង់ផ្ទះថ្មីមួយខ្នង មានទំហំ ទទឹង៤ម៉ែត្រ បណ្តោយ៦ម៉ែត្រ កម្ពស់៣.៨ម៉ែត្រ សង់ពីដែក ប្រក់ស័ង្កសី ជញ្ជាំងស័ង្កសី បាតចាក់ស៊ីម៉ងត៍ (សាប)សង់ផ្ទាល់ដី(ផ្ទះតៀម) និងបង្គន់អនាម័យ១ឈុត(គ្រឿងក្រោម) ចំណាយថវិកាសាងសង់ថវិកា ២.១៧៣,៩៤ដុល្លារ (មូលនិធិសាខា) និងទទួលបានអំណោយអង្ករ ៥០គីឡូក្រាម រួមនឹងគ្រឿងឧបភោគបរិភោគ សម្ភារៈ ប្រើប្រាស់ និងថវិកាមួយចំនួនផងដែរ។ ដោយឡែកចំពោះ១០គ្រួសារ ដែលមានជីវភាពខ្វះខាត ទទួល បាន អង្ករ ២៥ គីឡូក្រាម, គ្រឿង​ឧបភោគ​បរិភោគ​ រួមនឹងថវិកាមួយចំនួនទៀតផងដែរ៕